Шахснинг ўзини англаши ўз-ўзини бошқаришини ривожлантиришнинг асоси сифатида

Инсон илгарилари ҳам жамиятнинг асосий ишлаб чиқарувчи кучи ва барча ижтимоий жараёнларнинг субекти бўлиб келган. Ҳозирги даврда одамнинг психологик сифатлари кенг номоён қилинишига жамият томонидан эҳтиёж ортиб бормоқда. Бугунги кунда давлат ва жамиятдаги ўзгаришлар туфайли янги-янги уюшмалар, гуруҳлар вужудга келган бўлиб, бунинг натижасида турли ишбилармонлик ҳаракатлари авж олиб бормоқда. Буларнинг ҳаммаси ҳар бир шахсга хос бўлган психологик сифатларни мукаммал билишни тақозо этмоқда. Дарҳақиқат, юртимиздаги ривожланишлар туфайли халқимизнинг маънавий оламида, онгида жиддий ўзгаришлар юзага келмоқда. Шунинг учун давримиз шахсининг психологик сифатларини тадқиқ этиш муаммоларига ана шу сифатий ўзгаришларни ҳисобга олган ҳолда ёндошмоқ зарур.