Xalq qo‘shiqlarining tarbiyaviy ahamiyati

Mazkur maqolada O‘zbek xalq og‘zaki ijodining eng yorqin namunalaridan biri bo‘lgan xalq qo‘shiqlarining tarbiyaviy ahamiyati haqida so‘z yuritiladi. Xalq qo‘shiqlari orqali yoshlarda milliy qadriyatlarni anglash, vatanparvarlik, mehnatsevarlik, ota-onaga hurmat, yurtga sadoqat kabi fazilatlarni shakllantirish masalalari yoritiladi. Shu bilan birga, xalq qo‘shiqlarining badiiy-estetik, axloqiy va pedagogik jihatlari tahlil qilinadi. Xalq qo‘shiqlari inson hayotining turli jabhalarini qamrab olib, quvonch, g‘am, muhabbat, sadoqat, mehnat, vafo kabi his-tuyg‘ularni ifoda etadi. O‘zbek xalqining boy og‘zaki ijodi asrlar davomida xalqning turmush tarzi, urf-odatlari, ma’naviy dunyosi va axloqiy qarashlarini o‘zida mujassam etib kelgan.