O‘zbekiston tijorat banklarida muammoli kreditlar bilan ishlash amaliyoti va ularning kredit riskini boshqarishdagi o‘rni

Maqolada O‘zbekiston tijorat banklarida muammoli kreditlar bilan ishlash va kredit risklarini boshqarish tizimi tahlil qilinadi. Kredit portfelidagi uzoq muddatli kreditlar ulushining ortishi fonida muammoli kreditlar (NPL) darajasining barqarorligi va ayrim banklarda yuqoriligi, risklarni baholash va monitoring qilish tizimlarining zaif joylari aniqlangan. Tadqiqotda kredit riskini kamaytirish bo‘yicha ilg‘or xalqaro tajribalarga, xususan “erta ogohlantirish tizimi”, “muammoli aktivlarni boshqarish kompaniyalari” va portfel darajasida risklarni boshqarish yondashuvlariga urg‘u berilgan. Xulosa sifatida, zamonaviy yondashuvlarni joriy etish va institutsional takomillashtirish zarurligi asoslab berilgan.