ЎЗБЕК АДАБИЙ ТАНҚИДИ ТАРАҚҚИЁТИ

Ўзбек миллатининг бой ва мазмунли адабий меросини ўрганиш ва тадқиқ этишда адабий танқиднинг роли беқиёсдир. Адабий танқиднинг пайдо бўлиши ва ривожланишида китобхоннинг ижтимоий эстетик эҳтиёжлари етакчи аҳамиятга эга бўлган. Бадиий асарни ўқиб чиққан саводхон ўқувчида ўз фикр-мулоҳазаларини баён этиш истаги пайдо бўлади. Бадиий асарнинг пайдо бўлиши билан унга баҳо берилиши унинг қимматини белгилаган. Илмий-эстетик тафаккур маҳсули саналувчи адабий танқид сўз санъати сифатида дунёга келиб, шаклланиш ва ривожланиш жараёнига кирган ҳодисадир. Адабий танқид ҳаракатдаги эстетик тафаккур тарзида адабий жараён моҳиятини таҳлил қилиш ва баҳолаш хусусиятини касб этган. Санъат қанчалик ички хилма-хилликка эга бўлса, танқид ҳам ўша соҳаларга тегишлилик касб этади.