Jigarning noalkogol yog‘ xastalligi diagnostikasi

Ushbu maqolada jigarning noalkogol yog‘ xastalligi (JNYoX) diagnostikasi hamda monitoringining zamonaviy va istiqbolli usullari haqida umumiy ma’lumot berilgan, JNYoX bilan og‘rigan bemorlarda nekrotik- yallig‘lanish jarayonlar va jigar fibrozini erta aniqlash va uning og‘irligini baholash uchun noinvaziv diagnostika usullarining roli muhokama qilingan. Jigarning noalkogol yog‘ xastaligi (JNYoX) bugungi kunda dunyo bo‘ylab tobora ko‘payib bormoqda va eng keng tarqalgan jigar kasalligi hisoblanadi. Semizlik, metabolik sindromning davom etayotgan epidemiyasi tufayli kasallanish tez sur’atlar bilan o‘sib bormoqda. Kasallikning dastlabki bosqichida tashxis qo‘yish katta amaliy ahamiyatga ega. Jarayon ko‘pincha simptomsiz kechishi tufayli yuqori xavf omili mavjud bo‘lgan odamlarni erta aniqlash uchun maqsadli diagnostik chora tadbirlarni to‘g‘ri olib borishni talab qiladi. So‘nggi yillarda jigarning noalkogol yog‘ xastalligi (JNYoX) surunkali jigar kasalliklari orasida etakchi o‘rinni egalladi va uning tarqalishi o‘sishda davom etmoqda. Bu esa tashvishli xolat, chunki bu patologiya yurak-qon tomir kasalliklari, 2-tip qandli diabet rivojlanishiga va jigar patologiyasining rivojlanishiga olib boruvchi xolatdir.